Precarios-Galicia

Os investigadores, tras a reunión en Ons: “A ausencia dun plan galego de investigación suporía unha catástrofe”

Joaquin — Mon, 30 Aug 2010 22:40:35 +0000

Investigadores galegos que traballan en centros españois e estranxeiros déronse cita na illa de Ons a pasada fin de semana para debatir sobre o futuro do sistema galego de investigación. A convocatoria foi realizada pola asociación de investigadores, técnicos e tecnólogos Precarios-Galicia.

A gran preocupación dos investigadores galegos é a falta de información sobre a posible renovación do Plan Galego de Investigación, Desenvolvemento e Innovación Tecnolóxica 2006-2010 (INCITE), que remata o próximo mes de decembro. Este plan supón na actualidade unha importante aposta pola investigación, pero necesita de melloras para ser máis ambicioso e sacar un maior aproveitamento da alta rentabilidade do investimento en I+D+i.

Dende Precarios-Galicia solicitáronse xa varias reunións co goberno autonómico para tratar este tema, e ningunha recibiu resposta. Pasado case un ano e medio da toma de posesión do Conselleiro de Economía e Industria e a escasos catro meses de que remate o INCITE, a comunidade científica non conta con ningún documento oficial sobre un futuro plan galego de investigación.

Os investigadores tamén descoñecen cando se creará a tan anunciada axencia galega de innovación. Esta axencia anunciouse como “de I+D+i” en setembro de 2009 para pasar a ser soamente “de innovación” uns meses despois. Por último, e segundo publica hoxe algún xornal citando un documento da Consellería de Economía e Industria, dita axencia volvería a ser de I+D+i. Ante a confusión xerada pola Xunta e as súas vagas declaracións de intencións, os investigadores anuncian que non consentirán reduccións da inversión en I+D+i. A falta de iniciativa do executivo autonómico para poñer en marcha un plan á altura do INCITE suporía unha catástrofe no eido científico galego e, de producirse esta situación, non se descarta a convocatoria de mobilizacións por parte do colectivo.

A inversión en ciencia debe ser continuada, e non dependente de ciclos políticos. Non é unha estratexia intelixente investir durante anos para deixar despois moitos proxectos sen rematar e ter que importar o coñecemento e a tecnoloxía dende outros países que sí apostan pola investigación como motor da economía. Por outra banda, dende Precarios-Galicia insístese en que non ten sentido formar a milleiros de investigadores durante varios anos para que, cando están no seu momento de máis alta produtividade, traballen no estranxeiro pola falta de emprego na comunidade.

Precarios-Galicia reclama á Xunta de Galicia información, diálogo, e un plan galego de investigación sólido para os vindeiros anos que mellore o INCITE. Por último, os investigadores piden unha mellor xestión dos centros de investigación galegos e recordan a importancia que a investigación básica ten a medio e longo plazo.

INVESTIGADORES GALEGOS REÚNENSE NA ILLA DE ONS PREOCUPADOS POLO FUTURO DO PLAN INCITE

Noe — Thu, 26 Aug 2010 12:05:02 +0000

- Existe unha grave preocupación no colectivo pola falta de novas sobre a renovación do Plan Galego de Investigación, Desenvolvemento e Innovación Tecnolóxica (INCITE), que remata en decembro.

- O INCITE foi un dos mellores plans de investigación do estado español, e supuxo unha importante mellora nas condicións laborais dos investigadores predoutorais e posdoutorais durante os últimos anos.

- Os investigadores teñen previsto organizar en Ons un café científico e varias rutas de sendeirismo pola illa. Ademais, debatirán sobre as próximas accións a levar a cabo en defensa do sistema galego de I+D+i.

Investigadores galegos de diversos centros españois e europeos xuntaranse na illa de Ons esta fin de semana na primeira acampada organizada pola asociación de investigadores, técnicos e tecnólogos Precarios-Galicia. Este evento contará coa participación de investigadores galegos que realizan a súa labor no estranxeiro e desfrutan durante estes días das súas vacacións na nosa comunidade.

Preocupa moito no colectivo a gran incerteza causada pola ausencia de convocatorias de axudas para recursos humanos de investigación por parte do goberno autonómico. Estas axudas estaban dentro do plan INCITE, que remata en decembro, e sobre o que o executivo non aclarou aínda a súa renovación. O INCITE foi un dos mellores plans de investigación do estado español e supuxo unha importante mellora nas condicións laborais dos investigadores predoutorais e posdoutorais durante os últimos anos. Del depende o futuro de centos de investigadores galegos e do propio sistema galego de investigación, polo que a súa desaparición resultaría nunha nova marcha de investigadores moi cualificados cara outros países europeos e norteamericanos.

Durante a fin de semana Precarios-Galicia organizará en Ons varias actividades abertas ao público: unha charla informativa sobre a asociación -o sábado pola mañá- e un café científico -o sábado á noite-. Ademais, realizaranse varias rutas de sendeirismo pola illa e celebrarase unha reunión na que se debatirán as próximas iniciativas a levar a cabo en defensa do sistema galego de I+D+i.

Precarios-Galicia organiza unha acampada na Illa de Ons os días 28 e 29 de agosto.

Noe — Tue, 10 Aug 2010 07:42:36 +0000

Ola a todos!

Xa está confirmado que iremos de acampada!! Finalmente iremos á illa de Ons sempre e cando teñamos sitio, pero en principio parece ser que si. A cuestión é que para os que non nos seguen na lista de Precarios-Galicia e ao mellor queredes vir con nós a vivir esta experiencia, avisamos a través desta nota para que saibades un pouquiño o que temos pensado facer durante o fin de semana do 28 e 29 de agosto (só quedaremos unha noite na illa). Vai aquí un borrador do PLANNING:

SÁBADO
Pola mañá: chegada, montar as tendas e charla de presentación.
Pola tarde: praia / tempo libre e ruta pola illa.
Pola noite: café científico.

DOMINGO
Pola mañá: reunión para informar e debatir sobre as nosas próximas actividades e obxectivos. Outra ruta pola illa.
Pola tarde: tempo libre, recollida e regreso.

O caso é que nos urxe MOITÍSIMO saber quenes van en concreto, pois imos pedir un permiso especial como asociación e desde Parques Naturales pídennos os nomes e DNI’s dos que vaiamos. Así que por favor, se estades interesados, ENVIADE UN MAIL HOXE a presidencia@precariosgalicia.org co voso nome e DNI, pois non queremos quedarnos sen sitio. Se houbera algún interesado/a que non pode ler este post hoxe, que envíe o mail igualmente e a ver se podemos ir engadíndoo/a á lista.

Animádevos, que o imos pasar moi ben!

PD: as cuestións de loxística comunicaranse na lista de Precarios-Galicia e aos interesados que se apunten no mail de presidencia.

Precarios-Galicia estará no Foro de I+D+i do Grupo Correo Gallego o vindeiro día 30 de xuño.

Noe — Sun, 27 Jun 2010 22:38:56 +0000

Precarios-Galicia foi invitada a participar no Ciclo de Foros que organiza o Grupo Correo Gallego. Neste caso estará adicado ao sector de I+D+i en Galicia, tanto a través das empresas privadas como a través do sistema público.

Haberá dúas mesas de debate: a primeira estará adicada ao I+D+i no mundo empresarial baixo o título A innovación tecnolóxica nas empresas galegas. Precarios-Galicia participará na segunda mesa O sistema público de investigación a partir das 12:30h. Nela, a presidenta da asociación, Noelia Cotón, fará unha presentación da asociación así como un repaso á situación actual do sistema público de investigación.

Próxima Asamblea

Joaquin — Wed, 02 Jun 2010 07:19:09 +0000

Xoves 17 de xuño na Sala de Xuntas da Facultade de Física de Santiago.

Asemblea Extraordinaria
1ª convocatoria: 18:30h
2ª convocatoria: 19:00h
Orde do día:
- Aprobación, se procede, da reforma dos Estatutos de Precarios-Galicia.

Asemblea Extraordinaria
1ª convocatoria: 18:35h
2ª convocatoria: 19:05h
Orde do día:
- Renovación da Xunta de Representantes.

Asemblea Ordinaria
1ª convocatoria: 18:40h
2ª convocatoria: 19:10h
Orde do día:
- Aprobación, se procede, da acta da asamblea anterior.
- Aprobación, se procede, do estado de contas.
- Discusión das próximas actividades/actuacións que debe levar a asociación.
- Rolda aberta de intervencións.

Premio Nobel coa camiseta de Precarios-Galicia!

Joaquin — Mon, 31 May 2010 08:55:08 +0000

Sir Harold Kroto, Nobel de Química polo descubremento dos fullerenos, coa camiseta de Precarios-Galicia que lle entregamos despois da conferencia que impartiu ao abeiro do Programa ConCiencia da USC o pasado 27 de maio.

PRECARIOS GALICIA PARTICIPOU NO XV Día da Ciencia na Rúa na CORUÑA

Joaquin — Wed, 12 May 2010 08:55:08 +0000

O pasado sábado día 8 de maio Precarios-Galicia participou no XV Día da Ciencia na Rúa na Coruña. Na súa “jaima” leváronse a cabo diversos experimentos científicos e proxentáronse vídeos para as delicias dos máis cativos e dos que non o eran tanto.

Para uns e outros, esta actividade de divulgación resultou do máis enriquecedora.

Graciñas a todos!

PRECARIOS-GALICIA PRESÉNTASE ÁS ELECCIÓNS DE REPRESENTANTES DE CLAUSTRO DA USC.

Noe — Wed, 21 Apr 2010 17:41:32 +0000

A asociación de investigadores, técnicos e tecnólogos Precarios-Galicia vén de presentar as súas candidaturas para as eleccións de representantes de Claustro da USC nas modalidades de “Outro PDI contratado” e “Investigadores en formación”.

En total son tres as candidaturas que Precarios-Galicia presenta para poder ter voz e voto no Claustro Universitario e, polo tanto, poder tomar parte nas decisións dos órganos de goberno da USC, especialmente nas que abrangan ao colectivo relacionado coa investigación. Actualmente estamos mantendo reunións cos candidatos a Reitor/a da USC para saber cales seran as súas liñas de actuación en caso de saíren elixidos.

De cara a estas eleccións, Precarios-Galicia traballará e loitará por que se cumplan os seguintes obxectivos:

• Substitución completa das bolsas por contratos, con especial atención por que desaparezan os investigadores sen remuneración (sen papeis): toda persoa que desempeñe o seu traballo de investigación na USC, deberá ter un contrato.
• Información clara e veraz e solución da precaria situación do persoal investigador en formación e perfeccionamento con cargo a proxectos de investigación na USC.
• Mellora sustancial e inclusión de todo o persoal investigador en formación e perfeccionamento na normativa para a prevención de riscos laborais da USC.
• Obrigatoria adscripción dos contratos predoutorais á categoría de PDI. Actualmente esta figura é considerada PAS, carecendo dos dereitos do PDI, como por exemplo concurrir ás eleccións dentro do grupo de “investigadores en formación”.
• Elaboración e aprobación do Estatuto do investigador en fase inicial da USC.
• Establecemento dun mecanismo e órgano dentro da USC de arbitraxe nos conflitos entre doutorandos e directores de tese.
• Deseño dunha carreira investigadora na USC coherente co EEES e o EEI.

Ademais, Precarios-Galicia propoñerá unha serie de medidas que considera primordiais para o colectivo investigador e técnico da USC:

• A inclusión no convenio colectivo dos investigadores en formación e perfeccionamento contratados con cargo a un proxecto de investigación na USC.
• Eliminación das bolsas BC, BII e BAi por encubriren postos de traballo na USC.
• A transparencia nas convocatorias da USC: anuncios públicos nun repositorio centralizado, prazo suficiente para a presentación da documentación por parte dos candidatos, baremos previos detallados e resolución a través dunha comisión.
• Axilización dos trámites de matrícula de posgrao e doutoramento e do sistema de xestión de persoal, de modo que se eviten retrasos de meses na formalización de documentos e inconvenientes como a cancelación de tarxetas de identidade universitaria ou contas de correo pola discontinuidade entre contratos.

O compromiso coa dignificación da carreira investigadora e a eliminación da precariedade laboral dos mozos/as investigadores na Universidade de Santiago, lévanos a presentarnos novamente ás eleccións a representantes no Claustro da USC. Esta é unha oportunidade clave para comezar unha nova e mellor etapa para os investigadores en fase inicial na USC! É por iso polo que, se pertences a un dos dous colectivos da USC aos que nos presentamos, pedímosche que o 5 de maio votes á asociación de investigadores, técnicos e tecnólogos Precarios-Galicia.

Toda la información sobre el II Taller de Investigación Científica “Una profesión ¿con futuro?” (A Coruña, 17 y 18 de marzo de 2010) está a tu disposición…

Joaquin — Mon, 08 Mar 2010 10:46:12 +0000

… haciendo click aquí. ¡Te esperamos!

Gran repercusión da manifestación do 6M nos medios de comunicación!

Noe — Mon, 08 Mar 2010 10:44:44 +0000

A manifestación do pasado sábado 6 de marzo foi todo un éxito! A continuación tedes os enlaces das numerosas noticias que se publicaron nos medios entre o sábado 6 e o domingo 7. Nunca unha manifestación organizada por mozos investigadores tivera tanta repercusión. Moitísimas felicidades a todos e todas e moitísimas grazas aos asistentes!!

Aqui estan os cortes das noticias en television:
TVE.
A Galega: telexornal mediodia, telexornal seran.
Telemadrid.

E aqui os recortes da prensa:
http://www.eldia.es/2010-03-07/sociedad/16-investigadores-exigen-apuesta-decidida-ciencia-recursos.htm

http://www.diariodeibiza.es/sociedad/2010/03/07/investigadores-salen-calle-exigir-garmendia-mayor-inversion/395573.html

http://www.laopinioncoruna.es/sociedad/2010/03/07/cientos-investigadores-reclaman-madrid-inversion-id/364485.html

http://www.larazon.es/noticia/4343-si-no-invertimos-en-i-d-seremos-un-pais-mediocre

http://www.ideal.es/almeria/v/20100307/sociedad/investigadores-salen-calle-para-20100307.html

http://www.diariocordoba.com/noticias/noticia.asp?pkid=544954

http://www.elperiodicoextremadura.com/noticias/noticia.asp?pkid=496712

http://www.elperiodicomediterraneo.com/noticias/noticia.asp?pkid=540316

http://www.laopiniondemurcia.es/cultura-sociedad/2010/03/07/investigadores-exigen-garmendia-mayor-inversion/234029.html

http://www.elperiodicodearagon.com/noticias/noticia.asp?pkid=564728

http://www.elperiodico.com/default.asp?idpublicacio_PK=46&idioma=CAS&idnoticia_PK=693514&idseccio_PK=1477&h=