Precarios Galicia

Capítulo I.- constitución, denominación, duración e enderezo

Capítulo II.- fins

Capítulo III.- dos socios e colaboradores. Procedemento de adquisición da calidade de socio e colaborador. Dereitos e deberes. Perda da calidade de socio ou colaborador

Capítulo IV.- órganos directivos e forma de administración.

Capítulo V.- patrimonio fundacional. Recursos económicos previstos e límites do orzamento anual.

Capítulo VI.- disolución da asociación.

Capítulo VII.- da liquidación do patrimonio.

CAPíTULO I.- CONSTITUCIÓN, DENOMINACIÓN, DURACIÓN E ENDEREZO

Artigo 1.- Constitución e denominación. Coa denominación de Asociación de Persoal Investigador e Técnico Non Contratado de Galicia (Asociación Precarios-Galicia), constitúese en Santiago de Compostela unha asociación sen ánimo de lucro de acordo co establecido no artigo 22 da Constitución Española, na Lei 191/64 de 24 de decembro de 1964 e normas complementarias do Decreto 1440/65, de 20 de maio de 1965.

Artigo 2.- Duración. Esta asociación terá unha duración ilimitada, e poden ingresar nela socios novos ou causar baixa os antigos sen necesidade dunha nova constitución. Ten personalidade xurídica propia desde o momento da súa inscrición no rexistro de asociacións.

Artigo 3.- Enderezo. O domicilio social de Precarios-Galicia fíxase en República de Arxentina 4, 5ºA e o seu ámbito de actuación abrangue a Comunidade Autónoma de Galicia.

CAPÍTULO II.- FINS

Artigo 4.- Os fins específicos desta asociación son, dentro dun réxime de liberdade, autonomía, representatividade e participación dos seus asociados:

1. Defende-los dereitos e aspiracións do persoal de investigación e técnico non contratado (graduandos, alumnos do terceiro ciclo, doutorandos, bolseiros/as de investigación predoutorais e posdoutorais, bolseiros/as técnicos e outro persoal sen financiamento) que realicen tarefas investigadoras ou técnicas en universidades, centros de investigación e outras institucións radicados en Galicia, independentemente de que o devandito persoal perciba financiamento estatal, privado ou careza del.

   Desde o punto de vista desta asociación será prioritaria a defensa, entre outros, dos seguintes dereitos considerados básicos:

   • Recoñecemento dos membros do colectivo como traballadores de feito e dereito mediante un contrato laboral, o que suporía a consecución de dereitos laborais, entre outros os derivados da cotización ó réxime da Seguridade Social. Preténdese, polo tanto, a substitución do sistema de bolsas por un sistema de contratación laboral.
   • Dereito do colectivo a traballar nunhas condicións dignas de seguridade e hixiene.
   • Dereito ás mesmas prestacións e servicios có persoal investigador, docente e técnico contratado.
   • Dereito de representación nos centros de traballo en que o colectivo leva a cabo o seu labor, recoñecéndolles ós seus membros voz e voto nos Consellos de Departamento e Xuntas de Instituto.
   • Recoñecemento dos méritos acumulados ó longo do período de traballo científico e técnico desenvolvido en departamentos universitarios, centros de investigación e outras institucións de cara a concursos de prazas relacionados coa continuación da actividade docente, investigadora ou técnica.
   • Expórlle-las reivindicacións do colectivo ás institucións e autoridades competentes.
2. Constitución dun servicio de información e asistencia ós membros do colectivo.
3. Estudio e promoción das iniciativas encamiñadas a conseguir unha mellora continuada no desenvolvemento da actividade dos membros do colectivo.
4. Establecemento de relacións con outras asociacións similares para alcanza-los obxectivos comúns.
5. Apoio para calquera tipo de acción lícita destinada a acada-los fins previstos.
6. Promoción dunha imaxe digna dos membros do colectivo fronte á opinión pública e ás institucións.

CAPÍTULO III.- DOS SOCIOS E COLABORADORES. PROCEDEMENTO DE ADQUISICIÓN DA CALIDADE DE SOCIO E COLABORADOR. DEREITOS E DEBERES. PERDA DA CALIDADE DE SOCIO OU COLABORADOR

Artigo 5.- Os membros de Precarios-Galicia poderán ser socios e colaboradores.

Artigo 6.- Poderán ser socios tódalas persoas maiores de idade e con capacidade de obrar, que teñan interese no desenvolvemento dos fins da asociación e á vez cumpran o requisito de seren persoal investigador ou técnico non contratado nos organismos públicos ou privados de investigación e outras institucións radicados en Galicia.

Artigo 7.- Poderán ser colaboradores tódalas persoas maiores de idade que non poidan incluírse na categoría de socios, que estean de acordo cos fins da asociación e desexen acada-los seus obxectivos.

Artigo 8.- Os socios e colaboradores presentarán unha solicitude para a súa admisión, agás no caso indicado no artigo 12. Ademais, no caso dos socios presentarase unha declaración xurada da súa condición de non contratado.

A) DEREITOS E DEBERES DOS SOCIOS

Amais dos expresamente recoñecidos polas leis, os socios terán os seguintes dereitos e deberes:

Artigo 9.- Son dereitos específicos dos socios:

1. Tomaren parte nas Asembleas Xerais e Grupos de Traballo con voz e voto.
2. Poderen ser elixidos para cargos directivos.
3. Gozaren de tódalas vantaxes e beneficios que a asociación poida obter.
4. Recibiren información sobre os acordos adoptados polos órganos da asociación.
5. Faceren suxestións ós membros da Xunta de Representantes co fin de conseguir un mellor cumprimento dos obxectivos da asociación.
6. Solicitaren e obteren explicacións sobre a administración e xestión da Xunta Directiva.

Artigo 10.- Son obrigas específicas dos asociados:

1. Prestaren cantos servicios determinen os Estatutos, o Regulamento de Réxime Interno e os acordos da Asemblea Xeral.
2. Desempeñaren os cargos para os que foron elixidos.
3. Asistiren ás Asembleas Xerais e demais actos que organice a asociación.
4. Satisfaceren as cotas ocasionais que se establezan.
5. Respectaren o previsto nestes Estatutos.

B) DEREITOS E DEBERES DOS COLABORADORES

Artigo 11.- Os colaboradores gozarán dos mesmos dereitos e deberes cós socios pero non poderán ser elixidos para desempeñar cargos directivos dentro da asociación nin terán dereito a voto nas Asembleas Xerais.

C) PERDA DA CALIDADE DE SOCIO OU COLABORADOR

Artigo 12.- A condición de socio ou colaborador pérdese:

1. Por propia vontade.
2. Por incumprimento das súas obrigas económicas.
3. No caso dos socios, tamén se perderá cando deixen de cumpri-lo requisito ó que se refire o artigo 6. Cando isto aconteza, o socio, de non indica-lo contrario, pasa á categoría de colaborador.
4. Por actuar gravemente contra os fins da asociación. Neste caso, a decisión acerca da perda da calidade de socio será tomada pola Asemblea Xeral Extraordinaria con maioría de dous tercios.

CAPÍTULO IV.- ÓRGANOS DIRECTIVOS E FORMA DE ADMINISTRACIÓN.

Artigo 13.- O réxime da asociación virá determinado polos presentes Estatutos e os acordos validamente adoptados polos órganos da asociación.

Artigo 14.-Os órganos directivos de Precarios-Galicia son:

1. A Asemblea Xeral
2. A Xunta de Representantes

A) DA ASEMBLEA XERAL

Artigo 15.- A Asemblea Xeral de Precarios-Galicia, máximo órgano da asociación, está formada por tódolos membros de Precarios-Galicia.

Artigo 16.- As reunións da Asemblea Xeral serán Ordinarias ou Extraordinarias. As reunións Ordinarias celebraranse como mínimo cada tres meses. As Extraordinarias celebraranse cando as circunstancias o aconsellen, cando a Xunta de Representantes o acorde ou cando o propoña por escrito unha décima parte dos asociados, con expresión concreta dos asuntos que deban ser tratados.

Artigo 17.- As convocatorias das Asembleas Xerais serán realizadas con antelación suficiente mediante un anuncio colocado no enderezo social, un comunicado na lista de correo electrónico da asociación e por outros medios alternativos que se consideren axeitados.

Artigo 18.- A Asemblea Xeral terá que ser convocada cando menos quince días antes da súa celebración para o caso de Asemblea Xeral Ordinaria, e cun mínimo de sete días para a Asemblea Xeral Extraordinaria. A Asemblea Xeral quedará validamente constituída en primeira convocatoria coa presencia da metade máis un dos seus membros con dereito a voto, e en segunda convocatoria calquera que sexa o número de asociados presentes.

Artigo 19.- O Presidente e Secretario das Asembleas Xerais serán os da Xunta de Representantes ou, no caso da ausencia destes, outro(s) socio(s) nos que delegasen por escrito.

Artigo 20.- Os acordos tomaranse por maioría simple de votos asistentes cando se trate da Asemblea Xeral Ordinaria e por maioría de 2/3 en primeira volta e simple en segunda, cando se trate da Asemblea Xeral Extraordinaria, coas excepcións que se contemplan no Regulamento de Réxime Interno. Os acordos adoptados obrigarán a tódolos socios, incluso ós non asistentes.

Artigo 21.- Son facultades da Asemblea Xeral Ordinaria:

1. Aproba-lo informe de xestión da Xunta de Representantes.
2. Examinar e aproba-lo estado de contas.
3. Aprobar, no seu caso, as propostas de directrices xerais que xurdan como iniciativa na Asemblea Xeral.
4. Manifesta-lo sentir dos membros de Precarios-Galicia en todo o relativo ó funcionamento da asociación e decidir acerca daquelas cuestións que, pola súa transcendencia, afecten ó funcionamento de Precarios-Galicia.
5. Apoia-la Xunta de Representantes no exercicio das súas atribucións. A Asemblea Xeral Ordinaria pode nomear, se o estima conveniente, comisións de traballo para determinadas cuestións do interese de Precarios-Galicia.
6. Aproba-lo Regulamento de Réxime Interno da asociación.
7. Aproba-los orzamentos de ingresos e gastos de cada exercicio.
8. Fixa-las cotas ocasionais.
9. Aprobar ou rexeita-las propostas da Xunta de Representantes, así como as que poidan xurdir da Asemblea Xeral, tocante ás actividades da asociación.
10. Decidir sobre a admisión de socios novos e sobre a expulsión daqueles outros que dean lugar a ela, conforme ó establecido nos presentes Estatutos.

Artigo 22.- Serán facultades da Asemblea Xeral Extraordinaria:

1. Aproba-la reforma dos Estatutos.
2. Controla-la xestión da Xunta de Representantes, coa posibilidade de somete-los seus membros a voto de censura; o voto de censura deberá, en todo caso, figurar na orde do día.
3. Elección dos membros da Xunta de Representantes.
4. Federación con outras asociacións a teor da lexislación vixente.
5. Acorda-la disolución da asociación.
6. Calquera outras non atribuídas expresamente nos Estatutos á Asemblea Xeral Ordinaria, á Xunta de Representantes ou á Xunta Directiva.

B) DA XUNTA DE REPRESENTANTES

Artigo 23.- A Xunta de Representantes de Precarios-Galicia será elixida pola Asemblea Xeral Extraordinaria. O seu mandato terá unha duración dun ano e estará formada por un número impar de membros, cun mínimo de 5 e un máximo de 13.

Os cargos dos membros da Xunta de Representantes serán:

1. Presidente
2. Vicepresidente
3. Tesoureiro
4. Secretario
5. Vocais

Artigo 24.- A Xunta de Representantes xuntarase polo menos unha vez cada dous meses en sesión ordinaria, e en sesión extraordinaria sempre que o estimen oportuno cando menos dous dos seus membros.

Artigo 25.- A Xunta quedará constituída cando asista a metade máis un dos seus membros. Os acordos tomaranse por maioría simple.

Artigo 26.- Cando se produza unha vacante convocarase unha Asemblea Xeral Extraordinaria ó termo da seguinte Asemblea Xeral Ordinaria, na que se elixirá un membro novo.

Artigo 27.- Correspóndelle á Xunta de Representantes:

1. Adopta-las determinacións necesarias para o funcionamento de Precarios-Galicia, recollidas nos presentes Estatutos.
2. Levar a cabo as propostas de directrices xerais e as decisións aprobadas pola Asemblea Xeral de Precarios-Galicia.
3. Elaborar e proporlle á Asemblea Xeral de Precarios-Galicia as actividades que en cada momento cumpra desenvolver.
4. Elaborar anualmente os proxectos de orzamentos e presentarllos á Asemblea Xeral de Precarios-Galicia.
5. Elaborar un Informe de Xestión Anual das actividades desenvolvidas pola devandita Xunta e presentarllo á Asemblea Xeral Ordinaria de socios de Precarios-Galicia.
6. Elabora-lo Regulamento de Réxime Interno da asociación e proporllo á Asemblea Xeral Ordinaria para a súa aprobación.
7. Informar periodicamente ó resto dos asociados acerca das actividades realizadas mediante a convocatoria de Asembleas Xerais Ordinarias ou Extraordinarias e comunicados a través da lista de correo electrónico de Precarios-Galicia.
8. Crea-las comisións que considere oportunas.

Artigo 28.- Son facultades de calquera dos membros da Xunta de Representantes:

1. Representar a tódolos efectos ós membros de Precarios-Galicia.
2. Velar polo cumprimento dos fins da asociación.
3. Presidir e convoca-la Xunta de Representantes, así como convoca-la Asemblea Xeral dos membros de Precarios-Galicia de acordo co disposto nos presentes Estatutos.
4. Informa-la Xunta de Representantes e a Asemblea Xeral de Precarios-Galicia das actividades por el ou ela realizadas no desempeño do seu cargo.
5. Supervisa-las actividades e administración xeral de Precarios-Galicia segundo as directrices aprobadas pola Asemblea Xeral e a Xunta de Representantes.
6. Presentar en todo caso un balance da xestión realizada ó termina-lo seu mandato, detallando a situación en que quedan os asuntos de Precarios-Galicia e ofrecendo a información necesaria para o traspaso de funcións ós seus sucesores.

Artigo 29.- As facultades enumeradas no artigo anterior serán desempeñadas sempre que sexa posible polo Presidente da Xunta de Representantes.

Artigo 30.- Correspóndelle ó Vicepresidente substituí-lo Presidente nos casos de vacante, ausencia ou enfermidade, colaborar con el ou ela e exerce-las atribucións que lle sexan delegadas ou encomendadas por este.

Artigo 31.- Correspóndelle ó Tesoureiro:

1. Recadar e custodia-los fondos da asociación e levar en orde o libro de contabilidade (no citado libro asentaranse os ingresos e recursos económicos e demais bens materiais propios; así mesmo detallaranse os gastos por partidas concretas e os seus conceptos).
2. Elabora-lo orzamento anual de Precarios-Galicia, así como as súas modificacións, e presentarllas á Xunta Directiva.
3. Autorizar, xunto a calquera dos membros da Xunta de Representantes, a disposición de fondos.
4. Buscar e proporlle á Xunta Directiva mecanismos de financiamento.

Artigo 32.- Correspóndelle ó Secretario:

1. Custodiar e leva-los libros de Actas e Rexistro, documentos e selo da asociación, así como a relación dos membros de Precarios-Galicia.
2. Estende-las actas das reunións da Xunta de Representantes e da Asemblea Xeral de Precarios-Galicia co visto e prace do Presidente e expedir certificación delas.
3. Colaborar cos restantes membros da Xunta de Representantes na preparación e convocatoria das reunións da Asemblea Xeral e da Xunta Directiva.
4. O libro de Rexistro conterá os nomes e apelidos dos asociados, enderezo e número de DNI, de pasaporte ou de tarxeta de residencia, Institución, Departamento e Centro no que desenvolve as súas actividades. Nel débese especificar se o asociado desempeña algún cargo na asociación.
5. O libro de actas consignará as reunións da Asemblea Xeral e dos demais órganos colexiados da asociación, con expresión da data, número de asistentes ás mesmas e acordos adoptados. As actas serán subscritas polo Presidente, o Secretario da asociación e dous socios asistentes ás reunións.
6. Correspóndelle ó Secretario de Precarios-Galicia levar un censo actualizado do número de compoñentes da Xunta de Representantes.

Artigo 33.- Correspóndelles ós Vocais:

1. Asesorar e colaborar co Presidente e Vicepresidente nas tarefas de goberno.
2. Organizar e coordinar comisións de estudio e traballo sobre temas de interese para Precarios-Galicia que xurdan como iniciativa da Asemblea Xeral ou da Xunta de Representantes.
3. Informa-la Xunta de Representantes e maila Asemblea Xeral de Precarios-Galicia da actividade desenvolvida por eles no desempeño do seu cargo.

Artigo 34.- Tódolos cargos directivos serán non remunerados.

CAP�?TULO V.- PATRIMONIO FUNDACIONAL. RECURSOS ECONÓMICOS PREVISTOS E L�?MITES DO ORZAMENTO ANUAL.

Artigo 35.- A asociación, ó inicia-las súas actividades, carece de patrimonio. Utilizará para o cumprimento dos seus fins os seguintes medios económicos:

1. Cotas dos socios.
2. Achegas económicas voluntarias.
3. Doazóns ou subvencións que puidese recibir.
4. Calquera outro recurso lícito.

Artigo 36.- A asociación terá como límite do seu orzamento anual 5.000.000 de pesetas.

CAPíTULO VI.- DISOLUCIÓN DA ASOCIACIÓN.

Artigo 37.- A disolución da asociación realizarase:

1. Por vontade dos asociados, acordada en Asemblea Xeral Extraordinaria por maioría das dúas terceiras partes dos mesmos.
2. Por sentencia xudicial.
3. Polas causas previstas no artigo 39 do Código Civil.

CAPíTULO VII.- DA LIQUIDACIÓN DO PATRIMONIO.

Artigo 38.- Acordada a disolución da asociación, a Xunta de Representantes designará dous socios liquidadores que, xunto co Presidente e Tesoureiro da asociación, procederán a efectua-la liquidación, pagando as súas débedas, cobrando os seus créditos e fixando o haber líquido resultante, se o houbese.

Artigo 39.- O patrimonio resultante da liquidación, se fose positivo, reverterá en beneficio dunha asociación ou entidade de carácter non lucrativo que a Asemblea Xeral Extraordinaria considere no seu momento.

Disposición final. A composición da Xunta de Representantes no momento da aprobación destes Estatutos foi: a) Presidente: b) Vicepresidente: c) Tesoureiro: d) Secretario: e) Vocais: